ವೆಸ್ಟ್ ಇಂಡೀಸ್ ಕ್ರಿಕೆಟ್ ತಂಡಕ್ಕೆ 2027ರ ಏಕದಿನ ವಿಶ್ವಕಪ್ಗೂ ಮುನ್ನ ದೊಡ್ಡ ಹಿನ್ನಡೆಯಾಗಿದೆ. ಅಫ್ಘಾನಿಸ್ತಾನ ತಂಡ ಐರ್ಲೆಂಡ್ ವಿರುದ್ಧದ ಎರಡನೇ ಏಕದಿನ ಪಂದ್ಯದಲ್ಲಿ 92 ರನ್ಗಳ ಭರ್ಜರಿ ಗೆಲುವು ಸಾಧಿಸಿದ ಬೆನ್ನಲ್ಲೇ, ವೆಸ್ಟ್ ಇಂಡೀಸ್ಗೆ ವಿಶ್ವಕಪ್ನ ನೇರ ಅರ್ಹತೆ ಪಡೆಯುವ ಅವಕಾಶ ಸಂಪೂರ್ಣವಾಗಿ ಕೈತಪ್ಪಿದೆ. ಹೀಗಾಗಿ ಎರಡು ಬಾರಿ ವಿಶ್ವ ಚಾಂಪಿಯನ್ ಆಗಿರುವ ಕೆರಿಬಿಯನ್ ತಂಡ ಮತ್ತೊಮ್ಮೆ ಅರ್ಹತಾ ಸುತ್ತಿನ ಮೂಲಕ ವಿಶ್ವಕಪ್ ಪ್ರವೇಶಿಸುವ ಹಾದಿಯಲ್ಲಿ ಸಾಗಬೇಕಾಗಿದೆ.
ಐರ್ಲೆಂಡ್ ವಿರುದ್ಧ ನಡೆದ ಪಂದ್ಯದಲ್ಲಿ ಅಫ್ಘಾನಿಸ್ತಾನ ಮೊದಲು ಬ್ಯಾಟಿಂಗ್ ಮಾಡಿ 47 ಓವರ್ಗಳಲ್ಲಿ 8 ವಿಕೆಟ್ ನಷ್ಟಕ್ಕೆ 299 ರನ್ಗಳ ಬೃಹತ್ ಮೊತ್ತ ಕಲೆಹಾಕಿತು. ಗುರಿ ಬೆನ್ನಟ್ಟಿದ ಐರ್ಲೆಂಡ್ ತಂಡ 207 ರನ್ಗಳಿಗೆ ಸರ್ವಪತನ ಕಂಡಿತು. ಈ ಗೆಲುವಿನಲ್ಲಿ ಅಫ್ಘಾನಿಸ್ತಾನದ ಸ್ಟಾರ್ ಸ್ಪಿನ್ನರ್ Rashid Khan ಪ್ರಮುಖ ಪಾತ್ರ ವಹಿಸಿದರು. ಅವರು ಕೇವಲ 34 ರನ್ ನೀಡಿ 6 ವಿಕೆಟ್ ಕಬಳಿಸಿ ಐರ್ಲೆಂಡ್ ಬ್ಯಾಟಿಂಗ್ ಪಡೆಯನ್ನು ಕುಸಿಯುವಂತೆ ಮಾಡಿದರು.
ಈ ಫಲಿತಾಂಶದಿಂದ ಅಫ್ಘಾನಿಸ್ತಾನದ ರ್ಯಾಂಕಿಂಗ್ ಸ್ಥಾನ ಮತ್ತಷ್ಟು ಬಲಗೊಂಡಿದ್ದು, ವೆಸ್ಟ್ ಇಂಡೀಸ್ಗೆ ನೇರ ಅರ್ಹತೆಯ ಲೆಕ್ಕಾಚಾರದಿಂದ ಹೊರಬೀಳುವ ಪರಿಸ್ಥಿತಿ ನಿರ್ಮಾಣವಾಗಿದೆ. 2027ರ ವಿಶ್ವಕಪ್ಗೆ ದಕ್ಷಿಣ ಆಫ್ರಿಕಾ ಮತ್ತು ಜಿಂಬಾಬ್ವೆ ಆತಿಥೇಯರಾಗಿ ನೇರ ಪ್ರವೇಶ ಪಡೆದಿದ್ದು, ಉಳಿದ ಸ್ಥಾನಗಳ ಪೈಕಿ ಹಲವು ತಂಡಗಳ ಅರ್ಹತೆ ICC ODI ರ್ಯಾಂಕಿಂಗ್ ಆಧಾರದಲ್ಲಿ ನಿರ್ಧಾರವಾಗಲಿದೆ. ರ್ಯಾಂಕಿಂಗ್ಗಾಗಿ ನಿಗದಿಪಡಿಸಿರುವ ಕಟ್ಆಫ್ ದಿನಾಂಕ ಸೆಪ್ಟೆಂಬರ್ 30, 2026 ಆಗಿದೆ.
ವೆಸ್ಟ್ ಇಂಡೀಸ್ಗೆ ಇದು ಹೊಸ ಸಮಸ್ಯೆಯಲ್ಲ. 2019ರ ವಿಶ್ವಕಪ್ಗೂ ಮುನ್ನವೂ ತಂಡ ನೇರ ಅರ್ಹತೆ ಪಡೆಯದೆ ಕ್ವಾಲಿಫಯರ್ಸ್ ಮೂಲಕ ಪ್ರವೇಶಿಸಿತ್ತು. 2023ರಲ್ಲಿ ಪರಿಸ್ಥಿತಿ ಇನ್ನಷ್ಟು ಕೆಟ್ಟದಾಗಿದ್ದು, ಕ್ವಾಲಿಫಯರ್ಸ್ನಲ್ಲೇ ಸೋತು ವಿಶ್ವಕಪ್ಗೆ ಅರ್ಹತೆ ಪಡೆಯಲು ವಿಫಲವಾಗಿತ್ತು.
ಇದೀಗ ಸತತ ಮೂರನೇ ವಿಶ್ವಕಪ್ ಚಕ್ರದಲ್ಲಿ ನೇರ ಪ್ರವೇಶ ತಪ್ಪಿರುವುದು ವೆಸ್ಟ್ ಇಂಡೀಸ್ ಕ್ರಿಕೆಟ್ಗೆ ದೊಡ್ಡ ಎಚ್ಚರಿಕೆಯ ಗಂಟೆಯಾಗಿದೆ. ಭಾರತದ ವಿರುದ್ಧ ಸೆಪ್ಟೆಂಬರ್ 27ರಿಂದ ಮೂರು ಏಕದಿನ ಪಂದ್ಯಗಳ ಸರಣಿ ನಡೆಯಲಿದ್ದು, ತಂಡದ ಮುಂದಿನ ಪ್ರಯಾಣದತ್ತ ಕ್ರಿಕೆಟ್ ಅಭಿಮಾನಿಗಳ ಗಮನ ನೆಟ್ಟಿದೆ
About the Author
